經紀黃剛剛先至話芬佬唔多睇好零售股前景，偏偏噚日多隻零售股就係咁升，好似Joyce（647）升10％，周生生（116）升3.85％等，好似同佢玩對抗一樣。
但經紀黃就反駁，佢都話零售股去年業績普遍好景，只係未來因租金上升等問題存有隱憂而已。佢重繼續口硬，話家陣臨近6月底半年結，好多基金股都會例牌造好，短線升幅唔係永恒咁講。
查實除咗零售股外，地產股近排亦相當好炒，繼多隻大地產股先後發力抽高，個別二三線地產股亦錄得不俗升幅，其中渝太地產（075）昨日升7.5％，收1.29元，創下52周新高。
經紀黃話，渝太持有唔少商業物業，股價較資產值有大折讓，先排配售旗下港通控股（032）又套現5000萬元，但最重要係隻股貨源夠疏，個別芬佬又坐住唔少貨，股價好容易就砌上。
渝太昨日成交金額1822萬元，似乎真係有買盤殺到。
慕容小初