意甲嘅祖雲達斯一向喺球員轉會市場都好精明，低買高賣，年中賺唔少，不過最近關於查斯古特單deal就有啲失手。
祖記日前就拒絕咗車路士開價三千萬英鎊（約四億二千萬港元），收購已淪為第三前鋒嘅查斯古特，轉個頭祖記嘅主席莫治就想斟阿仙奴嘅韋拉，想韋拉加盟夥拍艾馬臣咁話。
我求大俠就覺得，祖記留住查斯古特，無非想用佢嚟作為交換韋拉嘅籌碼，話晒查斯古特同亨利喺法國青年軍一齊打起，老友鬼鬼。不過阿仙奴唔係儍仔，韋拉係兵工廠中場重心，查斯古特因傷已經大不如前，點肯交換呀；祖記不但換唔到人，成三千萬鎊好價錢又唔肯賣走多餘物資，點計都蝕。
講開阿仙奴，教練雲格講到明會收購兩位國際級球星，買史特加嘅白俄羅斯中場希比已經差唔多成事；重有消息話雲格會出價一千四百萬英鎊（約二億港元）壓過皇馬，收購巴西新星羅賓奴，而皮利斯又續約留隊，成事的話，來季英超又多番啲睇頭。