李國寶成功幫煲呔做特首，重帶埋兩個仔幫手助選，李家瞓身支持煲呔，加埋寶哥哥嘅江湖地位，同埋行會冇真正銀行家，煲呔搵佢入行會都係順理成章。不過煲呔擔心咁做會令外界以為係論功行賞嘅政治分贓，所以煲呔都唔敢輕舉妄動。
寶哥哥噚日大讚煲呔喺答問大會上表現好，答晒所有問題。八方問寶哥哥有冇人搵過佢入行會？佢話「完全冇」，咁滙豐大班鄭海泉入去好唔好？寶哥哥就話唔知。除咗寶哥哥，噚日好多議員都讚煲呔同恭賀佢成功當選。最誇張就係自由黨林健鋒，佢話噚日「藍天白雲」，已經冇再落雨，係曾蔭權為香港改善經濟嘅好預兆。不過呢番擦鞋言論，連支持煲呔嘅議員都頂唔順，搞到之後發問嘅泛聯盟劉秀成要率先表明：「擦鞋嘅嘢我唔講！」
傳真︰2623-9278
電郵︰[email protected]