近幾年，每年都聽到有朋友或朋友親人染上癌症，乳癌、子宮癌、肺癌、鼻咽癌、胃癌……總之乜都有，聽到都驚。西醫治癌之標準動作就係手術切除、化療，是否收效，人人不同，一啲得，一啲唔掂，聽天由命可也。大姐近日因意外受傷入院，朋友往探病，順便探埋同一醫院內之三個病人，其中一位係資深傳媒人，佢患癌入院，謹祝佢冇事返出嚟。
上星期與生物科技投資專家安森食飯，順便問佢美國治癌方法有乜進展，佢話進展緩慢，只係盡量透過定期檢查，希望可以盡早治理。中藥有冇效呢？安森話：「自從《壹週刊》品題，美國華人一度掀起華陽複方旋風，病人爭食，要入會先至可以每月郵購，每月收費八百美元，非常昂貴。至於是否有療效，好多講法都唔同。有人研究過，華陽複方係蔬果配料，內含高度纖維（highfibre），常人食咗，一定會去廁所，成個人鬆晒。其他不敢置評。」
左丁山於是打電話問Ｌ教授，佢係西醫名家，兼研究中藥，搵到古方畀嚴重糖尿病病人服食，免除佢哋切腿之苦痛（按：嚴重糖尿病患者有時須要切除腿部以挽救生命），甚為權威。Ｌ教授聽見左丁山問華陽複方，只係講咗一句：「你日日食多啲西芹、紅蘿蔔等蔬果啦。」
星期日閱報，衞生署建議多吃蔬果防癌，指市民應該每日食五份蔬果（四百克），相等於五個橙或者兩碗蔬菜。聽起嚟，好似好多噃，一日點食五個橙呀？一份水果等於一個橙、兩個布冧、半隻蕉；一份蔬菜等於一碗新鮮葉菜、半碗煮熟葉菜、半碗煮熟豆類，而一碗?一杯等於二百四十毫升。自問一日點都食唔到二份生果加三份蔬菜，如何是好？
吃蔬果有疑問，請打電話28330111向衞生署中央健康教育組查詢。