有「金牌大狀」之稱嘅資深大律師清洪，上個禮拜四踏入五十八歲生日，佢兩位城中名人老友劉鑾雄（大劉）及楊受成夫婦前晚專程同佢賀壽，清洪嘅媽媽、家姐、細妹、曾為英皇歌手嘅契仔周英杰同前打星陳惠敏等都有赴會。
聽陳伯話轉行
前晚七點幾清洪等人先喺銅鑼灣嘅富臨飯店歎鮑魚，到十點零鐘成班人就轉場去跑馬地嘅LePiano酒吧開P狂歡，喺酒吧入面佢哋唱歌又切生日蛋糕，直至凌晨時分眾人先至陸續離場。而久未露面嘅周英杰，幾年前佢喺契爺清洪介紹下簽英皇，但喺圈中發展麻麻，嗰時風水師陳伯尚未過身，佢建議周英杰轉行會更有可為，周英杰就因為陳伯呢句說話，同英皇解約然後去英國攻讀法律，𠵱家周英杰已經成為掛牌律師，但佢同楊受成仍然保持好友關係，不時相約傾偈歎茶。
