馬英九參選國民黨主席港澳地區後援會，噚日喺旺角一間酒樓開會，幫馬英九越洋造勢。中華旅行社前總經理鄭安國噚日亦專程前來打氣。八方見到鄭生真係有啲十年人事幾番新嘅感覺，當年因為鄭安國喺港台發表一篇《兩國論》，搞到張大姐冇啖好食。
今次選情好激烈，戰線甚至由台灣燒到特區，負責嘅區議員戴卓賢話，港澳地區約有二千個國民黨黨員，總之一票都唔可以漏，一定要全部投晒畀馬英九！
會上又播咗隻錄咗馬英九講話嘅光碟，馬英九當然叫大家多多支持啦。
人哋選個黨主席，拉票嘅手段都做得好過香港選特首。後援會又喺現場派挺馬宣傳單張，張單張列咗好多馬英九各方面嘅資料同私隱，有啲都幾搞笑，好似馬英九話，自己可以連續做一百二十下掌上壓、由出世到𠵱家捐咗四十一公升嘅血、錢就叫捐咗總共五千萬、三十年長跑嘅距離，差不多等於來回台北同高雄超過二十次！
傳真︰2623-9278
電郵︰[email protected]