近期陸續有二三線股公布業績，其中零售股莎莎國際（178）將於6月29日公布全年業績。唔少芬佬同分析員都估計莎莎今次盈利會賺過2億元，但基於多個因素，莎莎股價未必可能受惠。
經紀黃話，莎莎近年專注搞好獨家代理品牌以提升利潤，但自從地產市道復甦後，舖租好似火箭勁升，係1個任何零售股都要面對的大難題，莎莎地舖分店甚多，影響可想而知。此外，零售股年前發威，好大程度係受惠於大陸自由行，但家陣大陸自由行可以選擇去嘅國家愈來愈多，無疑會分薄香港嘅餅仔，對零售股又係另一大考驗。
往績靚未必有用
經紀黃又話，芬佬向來睇前景，零售股被睇淡，所以就算莎莎今次宣布業績超正，亦未必對股價有太大助力，除非有方法令芬佬相信可解決未來隱憂。
莎莎上周五升1.36％，收3.725元，比起最高峯的4.30元回落唔夠15%，幅度唔算好大，成交377萬股，金額1395萬元。
慕容小初