今個夏天有好幾個大牌球星去向未明，費高同佢嘅皇家馬德里舊隊友奧雲嘅前程備受關注。呢兩位前歐洲足球先生情況唔同，據報指皇馬想用奧雲作為交換車路士林柏特嘅籌碼，雖然觸礁，但證明奧雲前途不由自主。費高就唔同，佢死都唔肯降身價接受低工資，所以未獲英超四大球會垂青。
消息指，皇馬諗過出二千萬鎊（約二億八千三百萬港元）再用奧雲加埋蘇拉利交換林柏特，不過已被拒。
堂堂國家隊「大佬輩」，奧雲淪落到變成換師弟嘅籌碼，都咪話唔冇面。佢之前放晒聲想過檔曼聯，唔知最後成唔成事呢？
至於費高，佢周圍同人講要求九萬鎊（約一百二十七萬港元）周薪，呢個價或者幾年前重有得傾，今時今日佢叫得咁高又真係趕客，搞到利物浦、阿仙奴、車路士同曼聯都耍手擰頭，其他中小型班更唔在講。佢老人家都應該實際啲諗吓啦。