香港電台前途未卜，一切要睇煲呔想點搞。煲呔嘅哲學好簡單，你出嘅係政府糧，就要為政府做嘢，其他佢唔理得咁多。所以八方估，將來唔只港台，連所有政府資助嘅機構都要醒定啲，唔可以唱反調。
近期港台有唔少嘢燒到埋身，好似助理台長邵盧善呢個星期五就榮休，但係政府重未批出佢嘅接班人，八方聽聞教育電視台台長戴健文個名已經交咗上去，不過重未有回音。
有冇人接班，邵老總都走梗，因為佢已經夠六十歲退休年齡，冇得留低。邵盧善同八方講，佢入行三十八年，當年喺台大畢業就返港入親台嘅《工商日報》做記者，一做做咗十四年，八一年加入港台，喺新聞部做老總，後嚟升做助理處長，而《工商》喺八三年就關門大吉。
八方問邵老總有乜退休大計？佢話先去放吓大假先。原來佢都受高官離職規限，要過冷河半年，所以不如去玩吓先。
傳真︰2623-9278
電郵︰[email protected]