城市脈搏2:<br>?180北上轉Look潮抵快

城市脈搏2:
?180北上轉Look潮抵快

返大陸消費絕對唔係咩新鮮話題,雖然揼骨、中藥邊爐呢類活動好似唔係好適合後生仔女,但𠵱家有部份嘅年輕一輩都學人成日返深圳,何解?原來返大陸改換形象,價錢分分鐘只係香港嘅三分一,?180就可以極速喺大陸變身,快啲學吓啦!
記者:大比
攝影:衛信 
Models:Blanche、阿端
鳴謝:阿星

我哋以香港幾個潮變項目同深圳做個比較,分別係整樹脂甲同加長睫毛呢兩個愛靚女生必做嘅項目,重有駁highlight頭髮同電爆炸頭,睇埋價錢原來有好大分別!

Model改頭換面變靚女

Blanche今次潮變總共包括3個項目:第一個係為佢欠缺女人味嘅手指整樹脂甲,令佢「倔倔」的手指變身成纖纖長長嘅玉手;第二個就係為貪靚但又嫌麻煩嘅佢加密同加長眼睫毛,等佢可以慳番啲夾眼睫毛同搽mascara嘅時間;最後一個就係在頭上駁幾條螢光Highlight,令呆板嘅髮型睇落更sharp!

A.整樹脂甲45分鐘搞掂

整樹脂甲 平$280
香港價:$400
深圳價:120元人民幣

1.師傅首先要做嘅就係要磨走指甲上嘅角質,重要磨平指甲頭;

2.手指戴上呢個「慈禧指套」,目的係要固定樹脂甲嘅位置;

3.「慈禧指套」上有好幾條刻度,指甲想要長嘅,就要塗多啲「凝甲液」;

4.最後手指照一照藍光燈,樹脂甲就大功告成,整個過程歷時只係45分鐘!

5.順便一提:呢度修甲加埋齋搽甲油同畫花都係$10,有無得再平就要睇你講價嘅能力喇!

B.增多眼睫毛似足Barbie

加長睫毛平$130
香港價:$180
深圳價:50元人民幣

1.用白紙墊住啲眼睫毛,雖然有啲「求其」,但都無咩危險。

2.一堆堆備用睫毛原來都係人造纖維,師傅要一條條植上。

3.將睫毛一條一條用拑同膠水貼上去,少啲眼力都唔得!

4.完成啦!係未成個Barbie咁呢?!

C.5分鐘Highlight駁髮速成

駁highlight髮平$390
香港價:10條約$400
深圳價:10條10元人民幣

埋單計數
香港潮變價:$980
深圳潮變價:180元人民幣

阿燕Set頭化粧美甲屋
地址:深圳市東門九龍城4樓310A

1.駁髮過程真係好簡單,只需用呢個熱拑。

2.話咁快就駁好10條啦!

3.1蚊1條highlight,香港一定唔得啦!

「炸」爆頭平足$620

男士們都一樣可以喺深圳換潮Look,阿端最怕悶,幾時都鍾意試新嘢,今次膽粗粗由香港嚟到深圳,決定嚟一次大改變,身形好鬼瘦削嘅佢最適合誇張嘅髮型,所以佢把心一橫「炸爆」個頭!

爆炸頭平$620
香港潮變價:$800
深圳潮變價:180元人民幣

雅軒專業髮型設計
地址:羅湖區東門中威廣場2樓215舖

爆炸過程直擊

1.師傅好有心機將阿端嘅頭髮一撮撮用錫紙同師奶髮卷捲起。

2.時間關係已經去到後期階段,用熱力加快過程啦!

3.阿端潮變完成圖,其實成個電髮過程都只不過歷時兩個鐘頭多啲,真係快得有啲離譜,不過睇落又唔錯喎!

港人幾句

Winnie:「我兩個月就會上嚟一次,每次都係整指甲同腳甲囉。呢度比起香港平好多,整個樹脂甲都係香港嘅四分一價錢,點會唔上嚟做呀!」

Yao:「無咩時間返去大陸整喎,染髮都OK啦,我有時間都可能會去。」

植小姐:「我比較抗拒返大陸做美容,好似唔係好信得過,你知啦,大陸咩都有假,失敗咗邊個負責先!」