噚日係今季沙田馬場最後一次賽事，由於有兩場盃賽舉行，所以近期盛傳將出任政務司司長、𠵱家重係馬會董事嘅許仕仁亦有到場出席頒獎儀式。
班傳媒見到佢梗係查問佢嘅最新動向，不過許仕仁繼續保持一向作風，只係笑笑口話：「我今日都冇馬贏，點會有好消息啫？」然後就急急腳離開。
另外，馬會主席夏佳理丁母憂，上個禮拜初已經冇出席一切公開活動，好似禮拜四嘅「精英大師紀念冊公告會」，同前晚響麗嘉酒店舉行嘅「冠軍人馬獎」都唔見佢蹤影，到噚日下午先恢復露面。
夏佳理出名孝順，成日都提住好敬重做教師嘅母親當年獨力撫養佢同家姐成材，自細又教佢做人要「做自己、靠自己」。夏老太今年九十五歲，媽媽突然離開，夏佳理一定好傷心，加上佢隻愛駒翠河最近又喺澳洲病死，夏主席真係要保重保重。
傳真︰2623-9278
電郵︰[email protected]