許仕仁出任特區第二號人馬大局已定，白鴿黨指佢同新地打工、同郭氏兄弟好老友睇怕都改變唔到事實，當然點拆招要由肥龍自己搞掂，講唔定煲呔會企出嚟同佢講好話㖭。
肥許咁精，一定唔會打冇把握嘅仗。有人問八方，老許重返政府，會唔會帶人回朝？呢個都唔使多問，佢老人家咁念舊，必定會召回舊部。
八方講過，煲呔同個又叫Donald嘅舊新聞秘書陳羿甚合拍，所以佢好有機會加入特首辦幫手，即係話老許要自己搵人，咁三司嘅新聞主任，有政務官出身嘅，亦有新聞官出身嘅，要視乎老頂要乜人。
係人都記得，當年推行問責制之初，新聞處漏夜點將，為司局長配新秘，李國章至威，話自己喺中大有秘書用開，要帶埋入政府，老董冇意見，所以如果肥龍話要帶位新秘返工，煲呔一定冇反對，問題係馮國經肯唔肯放鄭麗敏（圖）走啫。
傳真︰2623-9278
電郵︰[email protected]