如果問你，最吸引師奶的是甚麼？師奶的強項是儲甚麼？無錯，兩條問題的答案都是錢。由大埔吹起的一股筍團風，正中師奶下懷。深圳團費$28起，加多$10玩轉中山，包兩餐，免小費，玩足、食足十個鐘確係抵到爛。不過這類筍團講到明係購物團，上車落車都係去購物景點，如何壓抑購物慾不會引致因小失大，就睇你嘅忍耐力喇！
記者：趙少昭
攝影：陳志亮
模特兒：Milo、Ivan（Zlect）
鳴謝：大航假期（62806663）
$38深圳團一日行程
晨早起床，清新開朗……早上七時，羅湖站外例牌烏燈黑火，離集合時間尚有三十分鐘，領隊人未到，一班師奶和長者早早候駕，大家都期待着展開一天共十小時的旅程。旅程期間，團中有師奶七人隊全程嘻嘻哈哈，傾足十小時偈都未瞓過，不時講鹹濕笑話，精力重好過我等年輕人，慚愧慚愧！
平價旅行社集中新界
現時提供大陸一日遊筍價由$28起（七月可能加價或加小費），集中在大埔或新界區的小型旅行社，部份在市區亦有分行，包括大航假期、達美旅遊（美食之旅）、得興旅運、熊貓假期等，團種十分廣泛，遍及深圳、中山、番禺、珠海、澳門等。若喜歡在香港出發，團費增至過百元及須湊足人數，所以專業團友話，永遠唔會湊夠人數。
筍團分為購物團、美食團和純玩團，多間小型旅行社各有特色吸引DieHardFans，專業團友主要是家庭主婦和退休人士，與多個導遊都非常熟絡，報團純為消磨時間，身在甲團，心已經飛到下周的乙團了。
其他受歡迎旅行團行程
兩餐各八餸一湯
當日小記參加一個中山團，暢遊三個景點五個購物點，食足兩餐，都只係$38，加上購物點離不開試食再𠱁你買健康產品，簡直由頭食到落尾，真係飽到嘔。雖然唔係食山珍海錯，但平均除開$19一餐，餐餐都係八餸一湯，有雞、有魚、有菜、有湯畀過你喫，夫復何求!?
晚餐菜單 飽到嘔
涼瓜煎蛋
油菜
蛇瓜肉片
鴨燜蓮藕
瑤柱籠仔蒸豆腐
漁家三寶
清蒸河上鮮
豐本骨香雞
火龍果花湯
南瓜餅
送埋甜品！
食足全程篇
團友唔消費 旅行社蝕錢
這類大陸筍團對旅行社和團友來說，其實是雙贏局面。雖然帳面看旅行社連小費也不收，還要包兩餐，消費者贏晒。事實上旅行社淨賺團費都夠畀膳食錢，而且購物點都係中正師奶死穴的健康養生產品，但啲錢就賺得險啲，一旦團友唔消費，有機會蝕本㗎！
旅行社封蝕本門招數
1.鼓勵客人電話留名，再補回銀行入數紙確認報團，連搵個人服侍你都慳番，不過團友都慳番搭車去報名嘅時間；
2.旅行社與購物景點掛鈎，後者會按人頭回佣及?或團友消費分帳給旅行社；
3.不設領隊只有當地導遊，導遊只賺團友在各景點消費的分佣。
專業團友慳錢招數
1.當推廣員蜂擁而入時，即撇！
2.避免跟耳仔軟的團友同坐，免受感染。
3.通常購物點都係賣健康養生食品，可聲稱對該食品敏感婉拒。
4.只買一款最平貨品解圍。
託港人報團淨食兩餐？
根據團友甲報料，不少在廣東省如中山置業或在深圳工作的香港人，託香港的親友代為報名參加呢類筍團，屆時在深圳蒲頭跟團玩，食完午餐就鬆人返屋企，計落條數重慳過自己畀幾十蚊坐長途巴士返中山，香港人算死草的本領，真係要寫個服字。咁計法，都可以套用落去中山、珠海自助遊的計劃。
有乜好買？
「資深」團友心聲
1.羅太 旨在拜神
身份：退休人士
報團次數：超過三次
「由遊蹤（已結業）玩到去大航，最鍾意參加拜神團，年年都有去龍母廟拜神，集齊人就包團。今日都係睇到去財神廟至嚟，食兩餐飯都抵晒啦！不過我主要唔係為食㗎！」
2.吳小姐 好學之士
身份：在職人士
報團次數：超過三次
「行程安排都OK，嚟過中山、惠州幾次，好多地方自己去唔到，$38搭車費都唔止啦！最緊要可以識多啲嘢，好似太極園講健康草藥，無人講解唔會識。我無特定參加邊間旅行社，之前報過大航同和聯，見到啲嘢平同啱用先會買。」
3.陳先生及陳太 消磨時間
身份：在職人士
報團次數：超過三次
「今次行程都唔錯，行吓搭吓車都好輕鬆。跟開大埔嗰間皇朝執咗，轉為參加呢個團，口碑幾好，膳食都好足，無一般購物團嘅購物點咁密。雖然來來去去都係嗰啲購物點，近近哋落街報名，消磨一日又食足兩餐，都好抵呀！」
4.樂儀 食到好飽
身份：在職人士
報團次數：超過兩次
「放假陪爹哋、媽咪嚟玩，朋友唔會參加呢類團。團費平平哋又去好多地方，有車坐幾舒服。中途好攰都無落車，寧願休息吓。午餐、晚餐都唔錯，菜式唔算曳，食到好飽！」
大型旅行社贏質素
另外可選擇大型旅行社如康泰、永安、星晨，相對團種走地道路線，購物點較少，但膳食較豐富精緻，香港出發，深圳解散，價錢由$68起（未包小費），若是中山、澳門線，包單程船票，一般由$159起（未包小費），一般小費約$50至$60。暫時以油蔴地旅遊「中山、順德祈福一天美食團」最筍，食足三餐，來回程搭直航船由$99起，雖然睇團資料，兩餐都食得好「齋」，都值得推介！
其他一天團推介
團名：新海味街美食一天團
費用：$28
查詢：26570012（得興旅運）
團名：中山荔枝園一天兩餐團
費用：$99
查詢：21088888（康泰旅行社）
團名：中山、順德祈福一天美食團
費用：$99
查詢：25167567（油蔴地旅遊）
