利物浦喺歐冠盃外圍賽首輪抽籤遇着威爾斯冠軍TNS，TNS就諗噱頭刺激入座率。
申請移師千禧球場作賽
本身由一間電腦公司冠名贊助嘅TNS，今次抽中利物浦可謂如願以償，因為佢哋曾經主動提出要踢一場附加賽，解決「紅軍」無參賽資格嘅問題。TNS到次回合先主場對「紅軍」，由於球會主場座位只可容納三千名觀眾，所以佢哋已經考慮向歐洲足協申請，要求將比賽移師到千禧球場舉行，話晒有成七萬個座位，坐滿三分之一都有賺。
TNS重諗到搵利物浦名宿，現任TNS非執行董事魯殊客串幫手落場比賽，希望有呢位前威爾斯射手壓陣刺激入座率；因為魯殊同球會行政總裁夏里士私交甚篤，亦幫過TNS出任前鋒教練，成事機會好大。四十三歲嘅魯殊上季踢過一場海嘯慈善賽，狀態保持得唔錯，睇嚟呢場比賽想唔成為焦點都幾難。