人稱「肥龍」嘅許仕仁，只待北京批准任命，不日就重返政府總部做政務司司長，佢早前已辭去九巴非執行董事職位，相信遲啲亦會退位讓賢交番馬會董事個位出嚟。做到被譽為「大董」嘅馬會董事，係身份地位象徵，因此唔少人都「吼」住呢個空缺，遲啲馬會大會改選競爭相信會好激烈。
鄭海泉有興趣
滙豐銀行大班鄭海泉啲老友放出聲氣，話鄭大班有興趣做「大董」；而小道消息稱永安百貨郭家郭志桁亦蠢蠢欲動；另外冠軍科技老闆簡文樂，都極大機會再接再厲；自由黨張宇人據說亦「恨」到出面。馬會中人分析，滙豐前大班艾爾敦已經係「大董」之一，滙豐冇理由有兩個代表啩，至於簡文樂一直係陪跑分子，今次都幾冷門；郭志桁同張宇人則各有擁躉，但最終邊個跑出，定係另有黑馬，真係未知之數。
馬會選舉只有少數會員有權投票，比特首選舉更小圈子，不過阿爺冇得欽點，會員投暗票唔怕受壓力，而且唔係錢多就大晒，做「大董」既要論資排輩亦講求個人能力，因為馬會係慈善公益資助機構，重要決策由馬會董事拍板，董事亦要兼顧監察賽事確保賽事公平舉行，否則得罪全港馬迷都幾麻煩。
殖民地時代唔少人戲言馬會先係香港最高決策機構，其次先輪到滙豐銀行同港督，煲呔智囊唔少同馬會關係甚深，殖民地傳統可能喺特區延續落去。
爆料熱線：29290000、27860099
報料傳真：26239278
報料電郵：[email protected]