所謂《無間》精神，用之無間！王晶真係香港影壇絕橋王，繼喺《無間道I》與II、III兩集夾縫時間，推出《黑白森林》殺個滿堂後，今個星期再出《黑白戰場》3區DVD；《江湖》式爭龍頭、再起用《無間》部份主角，加上凌厲嘅鏡頭攞位，今個星期新片嚟講，都叫可算一睇！
記者：朱崇德
今個星期返片唔多！《黑白戰場》係唯一一套港產片，跑出就必然喇！至於西片亦有部《奪命咒》新落場，佢同《黑》屬同期4月檔上畫電影，而且導演是《奪命狂呼》系列的韋斯奇里雲！電影其實講述人狼的故事，對人狼嘅傳說同有如愛滋病式傳播途徑，都有好精闢見解，可惜選角上，不論男男女女都有如《恐怖蠟像館》，對呢類片嚟講，可算敗筆。
黑幫傾軋 爭「公」款
差不多2年前的《黑白森林》，可算是一套食得幾「應」嘅《無間》式電影；今次新推《黑白戰場》，感覺雖然好像同一系列，不過兩者故事全無關連；「森林」是一個有關警察的黑與白的故事，至於今次的「戰場」，就改述黑道中人的黑、白之爭！
電影大意是講述由曾志偉所飾的黑幫龍頭，得悉有「自己人」覬覦他手上掌管的數億「公」款及龍頭之位；早萌退意的曾為免除後患，決定出動部署多時，以廖啟智及余文樂為首的「御林精兵」，反來個「借刀殺人」；傾軋中，雙方互有損兵折將，而且在曾的背後，好像還隱藏着更多的陰謀，而背後的黃雀更叫呼之欲出，究竟誰將是最終贏家呢？
曾最搶鏡 余見摸底
片中最搶鏡者，當然係全套戲軸心人物曾志偉啦！對呢種老江湖、無毒不丈夫角色，曾喺《無間道》時就已經駕輕就熟，不過唯一可惜係少咗幾個影帝級角色同佢迫出戲味來，變成好似唱獨腳戲般、索然無味！片中可與他比拼者，相信是曾的忠僕──廖啟智，愚忠、愚勇式小人物角色，感覺完全是自然流露；不過戲中另一重要角色余文樂，戲份多了，感情、對白亦多了，反而有一種「摸底」感覺，真係要好好修煉一番！至於Bonus部份，基本冇乜嘢睇，預告片兩則，再加一個簡單演員介紹，有時間可以㩒嚟睇睇！
價錢：$65
區碼：3區
片長：90分鐘
發行：美亞娛樂
店舖查詢：DVDPro
電話：23326326
地址：旺角奶路臣街6E德發商場地庫B4舖