6月尾，被譽為「蟹中極品」的黃油蟹又出籠，錯過了又要等多一年，只要你揭開蟹蓋，就會明白黃油蟹為何如此得寵，蟹膏香氣撲鼻，連蟹腳也黃油滿溢，呷一啖蟹膏，甘香嫩滑齒頰留香。黃油蟹除傳統蒸煮外，還有創意炒、炸、焗等製法，夠膽重可以生食，豪得起的話試埋乾撈大排翅都重得！難怪潮人女子組合Krusty食到舔舔脷，激讚：「一年食一次，唔試勻以下10種食法，點對得住自己！」
記者：陳冰麗
攝影：林栢鈞、陳智良、黃子偉
Hairing：Jatco@ILCOLPO
春天：必吃名正言順賽螃蟹
Krusty成員活己嵐（Chucky）及張詠恩（Jan）原來是饞嘴之人，Jan原本一臉疲累，一講到食蟹即時生猛起來，她是典型蟹癡：「我好鍾意食蟹，膏蟹、肉蟹、黃油蟹、大閘蟹，乜蟹都鍾意食，每次至少食2隻至夠喉，試過最高紀錄一次過食5隻大閘蟹，食到好攰，食完好有滿足感。」食蟹會食到「攰」，佩服！她拆蟹亦有一手：「食黃油蟹要趁熱食蟹蓋，然後再食箝同蟹腳，順住咁食，5分鐘可以食完隻蟹。」來到「春天京川滬菜館」，她推介賽螃黃油蟹，賽螃蟹是傳統上海菜，用的是蛋白沒蟹的成份，今次用真真正正的蟹肉蟹膏炒，變得更名副其實。
春天京川滬菜館（31714500）
地址：尖沙嘴山林道21號1樓
營業時間：星期一至五11:30am至4:00pm，6:00pm至12:00mn；星期六、日及公眾假期11:30am至12:00mn
座位：110個
備註：黃油蟹菜式須1日前預訂
花雕醉黃油蟹 每隻$438
改良大閘蟹食法，用黃油蟹代替，先用玫瑰露浸一星期殺菌，再用12年花雕酒浸一星期，生吃，無論膏或肉都甘香軟滑。
年糕炒頂級黃油蟹 每隻$488
為保黃油不失，落鑊前先把黃油蟹拉油，然後才與年糕同炒，經黃油蟹炒過的煙韌年糕香濃惹味，肥膩？一年一次管他的！
賽螃黃油蟹 每隻$468
名副其實的賽螃蟹，紅白綠賣相靚絕，Jan至愛：「蟹肉鮮甜，蟹膏甘香，蛋白滑嘟嘟，配埋一齊啖啖都咁好味。」
欣圖軒：糯米飯蟹膏多到瀉
Chucky自言也愛蟹，但不像Jan般那樣瘋狂，在眾多蟹之中，她較愛膏蟹與黃油蟹：「我鍾意食香噴噴蟹膏多過食蟹肉，尤其係黃油蟹，黃油遍布全身，連蟹肉都滲有黃油，食落零舍甘香好味，講起都口水流。」她自認食蟹好論盡，形容自己每次食蟹如同與蟹拼搏：「剝殼好麻煩！」食完必定出一身汗，不用飲薑茶驅寒已夠㷫烚烚！她推介「欣圖軒」的鴛鴦糯米飯蒸黃油蟹，因為蟹蓋上的蟹膏多到瀉，大廚何師傅教路：「蟹蓋要趁熱食，蟹膏凍咗就無咁甘香！」
欣圖軒（27211211內線2243）
地址：尖沙嘴梳士巴利道18號香港洲際酒店地下
營業時間：12:00nn至2:30pm，6:00pm至11:00pm
座位：160個
威化黃油蟹卷 8件$280
12両蟹肉蟹膏，先連鮮奶、洋葱粒炒，用威化紙包住炸。Chucky：「外層鬆化脆卜卜，餡鮮超香甜，入口即化好似放煙花咁，過癮在唔使同蟹搏鬥，小朋友都會啱食！」
鴛鴦糯米飯蒸黃油蟹 每隻$630
半溶黃油滲透至黑白糯米飯中，飯變得更甘香鮮甜，足3人食用。Chucky：「勁多蟹膏呀，我鍾意用蟹膏撈飯呀！」
焗釀黃油蟹蓋 每隻$180
好香口，為避免焗乾蟹肉，半熟蟹肉及蟹膏先用鮮奶炒過才釀回蟹殼，再蘸麵包糠焗，有點西式焗蟹蓋Feel，用匙羹𢳂嚟食最正。
東來順：魚翅蟹肉啷口至夠豪
美食當前點忍口？Jan及Chucky一句到尾：「黃油蟹價錢雖然貴，但一年點都要豪番一次！」魚翅撈飯聽得多，黃油蟹乾撈大排翅又試過未？這是「東來順」大廚Kenny的得意傑作。論賣相，條條麵條般粗的大青片翅半透明靚到絕，論味道，為免破壞魚翅原味，不蘸任何醬汁，只伴同等份量的蟹膏及蟹肉同食，入口，果真有俗語所謂的「魚翅啷口」感覺。品嘗完黃油蟹，最適合來杯熱茶解油膩，這裏提供3款拉茶（各$28），一Order師傅即在你面前高難度表演拉茶，齋睇已經好過癮！
東來順（27332020）
地址：尖東麼地道69號帝苑酒店B2層
營業時間：11:30am至3:00pm，6:00pm至11:00pm
座位：196個
女兒紅蒸黃油蟹 每両$50
少有用女兒紅蒸，有酒香但不醉人，蟹膏也不覺太肥膩。Jan：「平時邊食大閘蟹會邊飲少少女兒紅，聽阿媽講有驅寒作用，食完黃油蟹都不妨呷啖女兒紅，解油膩吖嘛。」
蟹粉黃金鍋巴 8件$398
加工過的鍋巴，本身已滲有鹹蛋黃的鹹香，再配足6両重的黃油蟹粉食，非常惹味，包保食過停唔到口。
生拆黃油蟹手囗麵 $180
淨蟹膏及蟹肉已經足有2両半，老實講淨食味道會過濃，倒不如將其混在拉麵內一起食，彈牙的麵條味道即時豐富起來。
黃油蟹乾撈大排翅 $528
條條都有麵條般粗的大青片翅，拌同等份量的蟹膏及肉食，果真有魚翅啷口感覺，Jan及Chucky大叫：「貴一貴都要豪食一次。」
