肥仔Ｋ出外留學，由矽谷去ＬＡ、去倫敦，今年去到東京，快樂非常。佢在美國、英國，都係一個人住或與朋友同住，日日要自己煮飯洗碗洗廁所，覺得好辛苦，但亦訓練到成個住家男人咁款。𠵱家去到東京，住研究生宿舍，早晚兩餐食宿舍，午餐周圍打游擊食日本拉麵，洗宿舍廁所就一個月輪更一次，甚為輕鬆。肥仔Ｋ話日本大學宿舍飯餐嘅一個特色係多菜多魚少肉，好健康，應該可以幫到佢減肥，以前喺美英食pizza、腸仔、牛肉太多，未必健康也。
肥仔Ｋ食即食麵，甚為衞生，將啲貴價「一番」麵用滾水煮，再用水喉水過冷河，再煮，話脫油脫味精喎。左丁山照辦煮碗，發覺全無味道，「口裏淡出鳥來」，當肥仔Ｋ係儍嘅。但事實上，食啲最流行嘅即食麵，確係有味精、多油呢個問題，點好呢？
星期六行入超市，見到唔少人一箱箱「出前一丁」咁拖出嚟，乜咁好賣。原來是日以特價出售，平均每包賣一元八角左右，而平時「一丁」要賣兩個半一包，香港師奶最眼利，有平貨邊度會放過，立即掃貨。左丁山費事加入搶購行列，改買其他牌子，發覺某牌乏人問津，架上存貨最多，於是望真啲，咦，三個六一包，比「一丁」貴好多，唔怪得冇人吼。夠膽賣呢個價錢，唔通有料到，攞嚟睇，寫明不含MSG（味精），低脂健康，係非油炸麵，99%fatfree，啱聽噃，立即買兩包返屋企試吓，收銀員見有客買三元六角一包嘅貴價即食麵，竟然望多一眼。
試食一包，味道係冇咁濃郁，都唔錯吖，啱慣食淡、唔食鹹之人。不過香港人慣咗把口講健康，入口嘅食物，唔鹹唔濃唔辣就覺得冇味道，呢隻「健康即食麵」價錢貴咁多，應該唔會賣到成行成市。