陳小春近兩年電影作品大減，他直言因有導演十分自大，把演員當成傀儡，在片場咬住雪茄自覺話晒事，除了主角外，從不與其他演員溝通，令他對電影失去興趣，亦不會再與該導演合作，矛頭直指《柔道龍虎榜》的杜琪峰及最近曾合作的《頭文字D》劉偉強。
陳小春當年憑《古惑仔》系列電影走紅，但近年作品日漸減少，過去兩年小春參演的電影有劉偉強執導的《頭文字D》、杜琪峰的《柔道龍虎榜》及韋家輝執導的賀歲片《鬼馬狂想曲》，日前陳小春接受本報訪問時，坦言對電影失去興趣，原因是不滿有導演過份自大。
輕視配角
「我唔明白佢又唔解釋」
陳小春說：「拍戲係人哋叫拍乜就拍乜，有啲導演好自大，喺片場咬住支雪茄，佢要咁就咁，只係要一個聽話嘅傀儡，有時去到盲點，我唔明白，但佢又唔解釋畀我聽，但我覺得拍戲應該係teamwork（團體合作），演員同導演應該要溝通，否則出嚟嘅嘢唔會好。當然如果你係受重用嗰個，佢就唔會咁，但我唔care係男主角抑或係男配角，有啲導演我係唔會拍佢啲戲嘅，但當然唔係個個都係咁。」問小春所指的自大導演是誰？他說：「嗱，我冇講係邊個呀！」
被傳不和
遲到曾遭導演爆粗鬧
剛上映的《頭文字D》上畫兩日已收逾六百萬票房，但演員間的是非亦不絕，先有黃秋生指周杰倫毫無演技，接着是陳冠希不滿被周杰倫搶風頭，又有傳陳小春與導演劉偉強鬧不和。
上周一首映禮當天，司儀踢爆劉偉強於拍攝前曾親筆寫信給眾演員，鼓勵他們的士氣，獨欠陳小春，而小春則在台上回應說：「好感動，我唔係佢哋公司嘅演員，都有咁重戲份。」但實情小春在《頭》中的戲份甚少，對白不超過十句，小春此番說話，似是另有所指。
而去年與杜琪峰合作《柔道龍虎榜》時，陳小春一度辭演，最後只度期客串了一個佔戲不重的角色，有報道指小春有天開工時遲到兩個多小時，杜琪峰被迫先拍攝其他演員的戲份，等到不耐煩的他後來返回車內食雪茄，到小春現身時，杜琪峰明知有記者在場仍不客氣地說：「叫佢快X啲啦，成日都係咁。」
內地拍劇
「攝製隊好似大家庭咁」
杜琪峰出名在片場雪茄不離手，而劉偉強亦有食雪茄的習慣，韋家輝則只是偶一為之，依此看來，小春揚言不會再合作的雪茄導演，矛頭指向杜琪峰和劉偉強，對此小春的中國星經理人李小姐昨在電話中回應說：「我唔知佢講邊個，但我知道佢嗰日睇完首映，重同劉偉強一齊去消夜，有傾有講，不知幾開心。」
雖然小春對電影感失望，但他很享受在內地拍劇，他說：「導演同攝製隊都好nice，好似一個大家庭咁，乜嘢都可以傾，相處幾個月同劇組都做咗知交，香港嘅電視劇就唔會咁，電影更加唔使講，大家啱啱熟就玩完。」
再出新碟
「我唔care有冇人認同」
近年極少曝光的小春，大部份時間均在內地拍劇搵真銀，加上剛與經理人公司續約五年，據知收了千萬元續約費，早前賣出康樂園寓所又賺了一筆。小春坦言中國星待他不薄，故繼續合作。
小春又表示現時視拍劇為生計，音樂則是理想，他對上一張唱片銷情欠佳，小春歸咎於自己行得太快，搖滾樂不太適合香港聽眾，現時他正全力籌備全新大碟，音樂以R&B為主，再加上一些新元素，並會參與編曲，他說：「我想要多啲陳小春嘅嘢，唔care有冇人認同，我唔係話好識音樂，但我有一對幾好嘅耳仔，識分邊啲好聽、邊啲唔好聽。」
克盡孝道
「最緊要媽咪去得安詳」
雖然小春給人的印象是愛蒲、愛玩，但他絕對是圈中孝子，其母患癌數年的醫藥費數字驚人，但小春一力承擔，至今年初母親因病去世，令他的心情跌落谷底，特別為母親在深圳覓地土葬，鄰近沙灘，小春表示風水好不好不重要，環境卻肯定舒適。
小春說：「件事發生時，已經冇可能諗咁多嘢，但老竇要咁嘅儀式，媽咪親戚嗰邊又想要另一種儀式，冇時間傷心，最緊要媽咪去得安詳。我記得我當時離開咗香港三個月，十二月二十八號返香港，媽咪就喺一月二號入院，注定佢係要等我返嚟，佢昏迷咗兩個禮拜冇醒過，幸運嘅係佢去得唔辛苦，媽咪捱咗好多年，佢已經盡咗全力，我好開心可以入到呢行，否則冇能力負擔到醫藥費同使費。」
採訪：張止寒
攝影：葉君海
場地提供：九龍灣展貿君豪會
