建業實業（216）三個幾月以嚟，兜咗個圓底，喺1年高位之前，將破未破，係時候埋位。建業阿仔漢國（160）上年尾賣斷鑽石山地皮，勁賺2.3億元，利益由下而上，建業實收1.35億元，兼會喺下月公布05年度（3月止）成績單入帳，全年度純利上1.5億元，每股純利0.27元，PE由家嘅33倍大降到得番3倍。又建業透過阿仔揸住商廈物業，全部位於中上環及尖咀優質地區，總樓面近29萬平方呎，05年度中期無重估，每方呎樓面平均值不過3722元，呢期新聞所見，同區寫字樓物業呎價起碼5字頭，換言之，全年度純利，極有機會因嚟自物業重估增值，隨時有驚喜。建業NAV1.74元，淨係計鑽石山地皮已實現增值0.25元，NAV已經挨近兩蚊，上望1蚊，NAV折讓重有50%，before突破前，可以埋位。
航科昅實股東特別大會
航科（031）呢期喺0.4元邊位上上落落，嚟緊呢個星期，同航科公布05年度中期（6月止）前後，應該可以炒兩轉，又講兩點：第一，航科上個月公布話出售紅磡康力大廈，預計呢個月底可完成交易，航科預期可獲溢利1.45億元。嚟緊星期二（28日）將會就呢壇物業出售，舉行股東特別大會，若然通過，當好消息炒。第二，呢壇物業交易順利完成，即係話，航科應該趕得切05年度中期入帳，連埋航科上年尾出售尖咀康宏廣場，獲利9000萬元入帳，中期純利近兩億銀，同比會暴升132倍，刺激性好大。呢勻集中火力，昅實股東特別大會前後，有異動，走一轉無妨，跌穿4毫子短線橫行支持，畀番佢，輸極有譜。
錢雋