由日本女星深田恭子主演嘅新劇《好想有幸福》下月十四號會喺日本TBS電視台播出，為咗力谷新劇，恭子最近為最新一期日本雜誌《B.L.T》擔任封面女郎，重影咗一輯靚相，不過就見佢成個人圓咗好多。
心廣體胖
恭子早前拍攝電影《下妻物語》做熱愛Lolita服裝少女，之後又喺劇集《富豪刑警》做有錢女，有機會狂着靚衫。不過恭子今次就冇咁好彩，佢喺新劇飾演嘅淺田光，因為阿爸過世，阿媽又患病，搞到佢要肩負起照顧兩個細佬嘅責任，被迫讀到高中就輟學。好彩佢識咗由松下由樹飾演嘅電視台監製，重得對方引薦成為電視台助導。由於恭子要喺新劇入面扮演窮家女，打扮非常樸素，難怪佢為雜誌影相時，特別着上咗粉紅色娃娃裝，趁機過番鋪Lolita癮。
新劇叫《好想有幸福》，恭子話佢嘅幸福秘訣，就係經常將「好開心」掛喺口邊，自自然然心情亦會變好喎。向來身形圓潤嘅恭子喺年頭拍攝《富豪刑警》嘅時候曾經成功減肥，不過最近佢似乎再有發福迹象，一雙手臂粗壯咗唔少，睇嚟佢都係時候要忍忍口，畀啲心機keepfit啲喇！