呢幾日橫風橫雨，唔少人懶得出街，費事變落湯雞，要買樓都等好天至算，美聯集團蔣曜名話，前日好多預約睇樓都臨時取消，但公司突然接到個遲遲唔肯做決定嘅客電話，話要睇粉嶺牽晴間。有生意唔通唔做咩，點知個客睇完之後即刻扑槌，用一百四十萬買入十二座高層A室。
個客事後透露，原來特登想等埋大雨天，睇吓個單位有冇漏水先至買。蔣曜名話，當日個客係臨時請半日假嚟睇樓，檢查窗戶同牆身，足足用咗半粒鐘。雖然個客係第一次買樓，但就相當醒目同細心，唔知同佢嘅職業係教書有冇關呢？嚟緊呢個禮拜，日日落雨，各位買家知道點做啦！
講番落雨，美聯郭玉滿話，日前有同事冒雨入西貢送定畀業主，可能業主見到代理夠誠意，終於肯收票。
電郵地址：[email protected]