隔晚美股大散，港股由跌變升，市底好惡。升市中，仍有兩打窩輪跌幅達1成半，當中有P輪，有高溢價而將到期嘅C輪。
過去4個交易日，6月份即將完結，7月份到期嘅窩輪，變成「今個月到期」，8月份到期嘅窩輪則變成「下月到期」。每逢接近月尾，例牌有唔少窩輪因為壽命心理上短1個月，溢價大收縮，輪價大蒸發。月尾炒末日輪，要小心，咪淨係睇槓桿率，要睇埋溢價。
恒指升39點，地產股跑贏大市。信置（083）跌1格，係因早前先行急升。長實（001）、新地（016）、恒地（012）與新世界（017），都升得好好睇睇。長實與新地，好多C輪揀，炒家可根據個人喜好搵對象，保守派揀低溢價C輪埋手，搏殺派向高槓桿率輪埋手。恒地與新世界C輪，輪種較少，信置C輪亦係。
恒地C輪4593：恒地C輪12隻，4593最靚，明年1月夠鐘，輪價16.9仙，溢價4.2%，槓桿率21.9倍（有效12倍），引伸波幅14.4%。好難大手買賣，昨日成交得64萬。
新世界C輪2248：新世界C輪3件，表面數據最靚嘅係窗口定界輪2248，9月尾到期，輪價26仙，根據法興網頁所提供的資料，2248溢價0.3%，槓桿率3.6倍（有效亦係），引伸波幅冇意思。急升之後，爆炸力已減。冇乜街貨，發行商自己玩晒咁滯。
信置C輪4968：信置C輪得隻4968，明年5月中到期，輪價94仙，溢價10.3%，槓桿率9倍（有效5.3倍），引伸波幅27.5%。近期升幅大，值博率有限。
章盛