安森久居三藩市灣區，日日揸車到PaloAlto返工，在金門橋及101公路塞車，習以為常；上星期五黃昏自灣仔坐的士去尖東，猛話塞車得好緊要，左丁山笑佢：「唔使嗌喎，渥崙大橋在黃昏時候，你估會好得過紅隧咩！」
安森乃一流人才，去到邊都撈得掂。不過安森話山外有山，佢有一位香港人朋友，移民美國多年，最近俾新上市公司挖角，呢位老友Ｔ已經係CEO，生活安樂，一味推。上市公司老闆親自搵佢：「人工畀到你夠，加認股權、花紅，有乜唔好先？」Ｔ君諗咗一陣話：「三藩市屋價太貴，我唔捨得買！」老闆話：「我買一間新屋畀你住，你做滿四年，間屋送咗畀你。」Ｔ君又講：「我個仔喺呢個州有老友，學校又好，佢唔想郁。」老闆話：「我拍心口喺三藩市灣區搵一間一流學校畀佢讀，如果佢要返嚟搵朋友，我用私人飛機送佢飛嚟飛去！」Ｔ君一時之間諗唔到對方如此闊綽，唔知點樣去推。安森話：「美國人搶人才，出手之高，令人咋舌，香港好少會見到。」
安森有一次受客人邀請，夏天到阿拉斯加內陸河流釣魚，佢坐幾程飛機先至去到目的地，玩咗兩日就想走，其他釣友話玩得高興，叫佢留多半日，安森話：「對唔住，我要趕飛機。」幾位釣友一齊話：「怕乜噃，我哋送你返去三藩市。」原來其中有六七個人都係坐私人飛機去嘅，令到安森覺得自己好窮。事實係，呢班人都係生化基金投資經理，因公司投資成功，公司買私人飛機（corporatejet）畀佢哋用，包括去阿拉斯加釣魚。
左丁山就話安森一啲都唔窮，曾特首話自己係推銷員出身，為生活奔波；安森何嘗不然，亦係中學畢業之後就做推銷員，諗諗吓，肥佬黎發達之前，亦做過推銷員，推銷可能係極好嘅人生磨練。想六十歲時享受富豪生活或榮登特首寶座，不妨以推銷員為第一份職業。