「狂人之子」薩迪卡達菲加盟烏甸尼斯無耐，噚日隊波即刻落實搵哥斯美執教，好易令人聯想係薩迪卡達菲喺背後促成呢件事。「狂人之子」之前玩轉佩魯賈，為隊波增加知名度同利益，但間接搞到隊波降班；即管睇吓烏甸尼斯會唔會步佩魯賈後塵，有名有利但成績唔掂。
分心歐冠盃兼主力流失
薩迪卡達菲同哥斯美以前喺佩魯賈合作過，據講前者有好多特權，衰啲講隊友同佢練波都怕踢親佢，想認真啲都唔掂；至怕呢種風氣會帶到去烏甸。
事實上，烏甸尼斯未來已經有唔少問題要面對，一來要分心應付歐冠盃，二來主力流失問題嚴重──贊古奴夫斯基過檔AC米蘭，高特立投愛華頓，其他主力好似大衞比沙路、迪米捷利照睇都唔留得長，隨時被挖角。有人擔心佢哋會成為佩魯賈，亦有人話可能成為另一隊切爾達（當年為兼顧歐冠盃搞到最後降班）；會唔會被批中，唔使一年自有分曉。