組合Twins噚日去咗商台接受訪問同宣傳佢哋隻新碟，最近蔡卓妍（阿Sa）嘅緋聞男友鄭中基喺一個網站節目度大爆性史，佢話試過有次做愛嘅時候遇上地震，問阿Sa有冇興趣聽吓個節目？阿Sa同鍾欣桐（阿嬌）一聽到就好驚訝咁話：「我哋兩個都未遇過地震。」阿Sa之後又話：「點解我哋冇接受過呢類訪問嘅？可能公司唔想我哋講呢啲啦，不過我都冇興趣聽番嗰個節目，我唔好奇，又唔八啩，其實唔關我事，每個人都有佢嘅歷史。」睇嚟阿Sa都幾大方喎！
「阿爸只係小股東」
另外，最近有傳鄭中基會入股阿Sa老竇嘅製作公司，如果係真，咁咪親上加親！不過阿Sa噚日聽到呢個傳聞後就即刻話：「佢哋應該係唔相識，或者識我都唔知，不過我阿爸只係小股東，重有好多其他股東。其實我都成日叫我阿爸唔好做，但係佢又話怕悶同驚有老人癡呆症喎！」
