活動嗰日氣溫有成32度，小記未去到目的地都已經成身流晒汗，心諗今日咁熱，啲狗仔都會熱到唔願郁啦！點知一去到發現十幾隻白雪雪嘅西魔不單止無熱到呆滯，反而極之活躍，由朝早到晏晝，又跑又游水都好似無咩倦意，連佢嘅主人都一樣咁有精力，睇嚟小記要操弗番自己先得喇！
記者：黃藹瑩
攝影：陳盛臣
鳴謝：寵物樂園、西魔會
專家先上堂教梳毛
今次「611端午人狗齊暢泳」活動嘅搞手Wilson好熱心，戶外活動未正式開始之前先同各位狗主上一課照顧西魔小百科堂，教大家點樣打理自己愛犬啲毛，重請埋寵物店主理人Banson真人示範。咪以為Banson淨係教梳毛，其實佢重係今日所有比賽嘅禮物贊助人，將會送出大獎，包括MadeinUSA嘅大床、狗隻美毛粉同埋維他命K丸，各位狗主同狗仔，努力啦！
西魔唔係雪地狗
不過唔講唔知，一直以為西魔係屬於冰天嘅雪地嘅大隻狗種，來到香港呢啲亞熱帶地方夏天非要將厚厚嘅白毛剃走不可，原來剛好相反，佢哋面頭層粗毛不過係好似件衫咁，有保護嘅作用，較易散熱。
講咗咁耐，狗主們雖然好專心咁聽，但係狗仔們都開始唔耐煩，在房中走來走去，好似要話畀主人聽：「我要出去玩呀！」無辦法啦，狗仔們至係主角嘛，立即去今日嘅戲肉──春色無邊！
狗都要着救生衣？
唔知係咪天氣實在太熱了，十幾隻狗仔急不及待已經跳咗落冰涼嘅泳池之中，擺出一副悠閒舒適嘅樣子，搞到小記都想不顧一切跳埋落水中同佢哋游！
雖然有人話狗天生就根本識得游水，但係唔知呢個理論係咪只係適合嗰啲無人照顧嘅狗呢？在場就有兩隻狗係初次下水，為免遇溺，須由主人陪同下着住救生衣喺水中「暢泳」。
兩棲戰一觸即發
經過半個鐘頭嘅熱身之後，就係緊張刺激嘅游水比賽。除咗啲狗，個個主人都好緊張，抱住自己隻狗在池邊準備，連引誘狗仔們前進嘅餌都拋埋落水，好，Ready……Go！
比賽1 西魔大玩水上飄
可惜嘅係狗仔們又點會好似我哋咁，一跳到落水就想佢哋游到直線去到對岸吖？所以一落水，班狗仔可謂失晒控咁，場面極之混亂，一啲游游吓返轉頭，有啲又無端端怕羞唔肯游，有啲就一支箭咁飆……出橫邊，唉～總之邊隻狗仔最先去到對岸已經係奇迹！
比賽2 轉戰陸上人狗大混戰
之前泳池激戰唔服輸唔打緊，各位重有機會！呢round嘅激鬥由水搬番去陸地，主人都要落場比賽，一於睇吓你哋人狗係咪合拍!?比賽好簡單，主人負責綁氣球喺狗仔的前左腳同後右腳，各位狗主同佢哋班愛犬一齊跑到對面，睇吓邊個最快。
比賽3 拉雪橇變拉鞋盒？
兩個回合又點夠呢？加埋第三個回合就差唔多，如果唔係就勝之不武啦！最後一個回合應該係西魔都會識，就係拉雪橇啦！不過香港搵唔到雪橇，各位西魔大哥，用鞋盒頂住檔先啦！
頒獎實況
比賽正式結束，𠵱家係簡單而隆重嘅頒獎典禮！
沖涼篇
玩到周身污糟晒，梗係要沖個靚涼啦！小記直擊西魔沖涼實況！
