創業板中，近排有隻浪潮國際（8141）相當搶鏡，公司日前表示與1名投資者洽商配股後，炒味更濃。
經紀陳話，江湖傳聞洽商入股浪潮是一家美資大型機構投資者，所以隻股表現咁勇猛，但與此同時，聽講在浪潮5月配股時接貨的投資者，正默默出貨，而浪潮現價比配售價高出1倍有多，接貨者真係賺到笑。
浪潮在5月中時，公布以每股0.38元，配售5200萬股，集資1872萬元。之後冇耐，隻股就係咁升，起初成交一直唔多，成個乾升格局，搞到小初有消息都唔敢亂跟。不過，自從浪潮近排公布話與獨立投資者再磋商配股後，成交量即刻大咗好多。
浪潮昨日最高見過1.06元，平收0.94元，成交448.8萬股，金額432.46萬元。話就話有猛人入局，但家陣先至追入，好易接火棒。
慕容小初