所謂有人辭官歸故里，有人漏夜趕科場，煲呔無懼老董被北京硬扯下台嘅可怕經歷，噚日攜同第一夫人曾鮑笑薇一齊入人民大會堂接聖旨。溫家寶二話不說，客套話亦少講，祝賀都話唔重要，最緊要係叫煲呔要記住祖國同全體港人嘅渴望同期待，臨尾重贈佢一句「士不可以不弘毅，任重而道遠」。
叫煲呔做「士」，好多人都話要抗議，但係溫總讀四書五經大，所以出口成文，可能真係抬舉咗曾先生小小，溫總叫煲呔要弘毅，即係叫佢要有廣大嘅見識同學問，做人要強而能決斷，咁呢啲都係做大賢人嘅條件，煲呔做唔做到好難講，因為所謂臨老讀古書，唔知佢明唔明。
北京面色唔易睇
重有，所謂任重道遠，即係有排你捱，唔好輕言放棄，做中國領導個個都係諗住死而後已，呢個讀番書嘅煲呔亦要慢慢領會，唔好以為「冇選擇地」入住咗禮賓府，戴住個特首銜就掂晒。當然胡主席亦對煲呔寄予厚望，因為佢一腳踢走江主席隻老懵馬董建華，話佢跛咗唔跑得，中途換人，委煲呔以重任，如果煲呔唔奮發進取，做場好戲畀大家睇，阿爺一定冇面畀。
嗱，有人形容過共產黨厲害過黑社會，因為佢哋開國之初，連黃賭毒都一鋪清晒，所以喺共產黨嘅管治下，黑社會都冇啖好食，你睇澳門回歸後一聲槍聲都冇就知道，呢個除咗鏵哥本事外，中央肯定幫好多手。
所以唔好話八方嚇煲呔，香港人好易𠱁，反而北京嘅面色唔易睇。激動還激動，蜜月期剛開始，遲吓就知味道。
傳真︰2623-9278
電郵︰[email protected]