起初睇到XBOX呢款新Game《Conker：LiveandReloaded》，封面主角係一隻咁可愛嘅松鼠，重以為係一款合家歡遊戲，睇清楚啲封面貼住張18歲以下不宜嘅標籤，立即引起唔少人嘅「興趣」！遊戲中主角松鼠外表雖然趣怪，不過就滿口粗言，動不動就會以暴力解決問題，而且重係唔見血唔收手嗰隻，可以話係一款集搞笑與暴力於一身嘅動作遊戲，XBOX上較為少見。
記者：許福合
(c)2005MicrosoftCorporation
今次《Conker》算係一個續集，背景同設計都以前作《Conker'sBadFurDay》為藍圖，人物設定都以「西化」為主，筆者玩落就覺得好有迪士尼動畫風格，而且遊戲內除咗動作場面，更加入咗好多解謎，係一款考腦筋多過鬥反應嘅作品。
故事幽默粗俗
《Conker》故事使用英文為主，玩慣日本Game雖然睇落總係唔慣，不過對了解劇情的確有幫助，同時亦可以睇到主角松鼠幽默搞笑嘅本色，不過呢隻松鼠認真低俗，好鬥又鍾意講粗口，玩家經常會聽到「嘟嘟」聲，就係松鼠使用佢嘅三字真言，而且無耐性都係佢一大毛病，好多時未聽NPC講解完就急住走，令到玩家唔知點算好，認真谷氣！所以對話時，玩家就要「聽清楚」，捕捉當中嘅提示，因為好多關卡靠武力係唔能夠過關，例如有一關要玩家由別處搬芝士畀老鼠食先開到門，否則無論你點打，老鼠都唔肯就範，玩落去重會有關卡要結合腦力加武力破關，係一款唔簡單嘅動作遊戲。
遊戲資料
主機：XBOX
開發：RARE
類型：動作
遊戲人數：1-2人
XBOXLIVE支援：語音通訊、網上對戰、遊戲內容下載
大殺傷力武器
雖然遊戲初期就只有一支木棍，不過你絕對唔可以睇小佢，因為玩落有機會獲得好多武器，甚至重型大炮，玩家喺開始遊戲前，就可從6種角色中選擇唔同嘅松鼠士兵，而按照兵種各自會使用唔同武器，由匕首、火箭炮到噴火槍都有，武器設計睇得出花咗好多心思，精細之餘，每種類別武器都有好多選擇，就好似一個軍火庫一樣，槍械武器之外，重有大規模攻擊嘅手榴彈同迫擊炮，戰鬥場面非常激烈。《Conker》另一個好玩之處，係有好多唔同交通工具同小裝備，玩家可以坐吉普車、坦克甚至轟炸機上陣殺敵，有時又可以做007，拎住望遠鏡收集情報，最過癮係可以扮死，當敵人接近突然出手，可殺對手一個措手不及。
上LIVE16人對戰
《Conker》除咗主角會經常講粗口外，更特別嘅係將敵人打敗後，會將敵人打到「標」晒血，打得激連鏡頭都「沾染」到，雖然玩落經常出現呢啲血腥場面，不過一啲都唔覺得恐怖，所以千祈咪被封面張18禁標籤所騙，而且主角嘅松鼠雖然暴力，但好唔襟打，得6粒朱古力（以朱古力作生命值），好彩版圖上好多地方有朱古力食可補充番，要多加留意！作為XBOX遊戲，當然唔少得LIVE支援，上網最多16人嘅8對8玩法，與單機版唔同，更着重團體戰力，而且戰鬥中途，加入咗好多突發事故，考驗玩家應變能力。喺LIVE上設有階級制度，當玩家贏得勳章就可以提升軍階，只有高級別玩家先可以打開新遊戲版圖，玩落更有趣味。
