小馬哥受唔少港人愛戴，佢今次出馬競選國民黨主席，有港澳地區黨員幫佢成立咗個後援會，星期日喺旺角倫敦酒樓舉行造勢大會，會長戴卓賢話小馬哥忙於拉票，所以唔會嚟香港，但可能派出代表為支持者打氣。
八方聽聞呢位代表，可能係前中華旅行社總經理鄭安國，鄭安國𠵱家係台北市市長辦公室主任，算係小馬哥嘅「大內總管」，鄭安國同香港右派人士關係良好，佢因「兩國論」調返台灣後，香港政界人士去台灣考察或觀選，鄭安國多數會盡地主之誼招呼。
國民黨今次選主席，台灣以外地區黨員可以郵寄投票，戴卓賢透露港澳地區約有千幾二千個黨員，估計大部份支持小馬哥，王金平方面就未見有乜動靜，佢話自己有資格投票，但唔肯親口證實係國民黨黨員。國民黨同中共關係已經解凍，係黨員都唔怕認啦，民進黨黨員就怕曝光啫。
傳真︰2623-9278
電郵︰[email protected]