Toby與Macy真幸福！Fans落手落腳為她們炮製美食，每道菜都有益有諗頭。為了慰勞他們，Toby和Macy決定煮番幾味生果菜回禮。Toby更加狀態大勇，一拿菜刀立即廚神上身，三兩下工夫就完成一道蘋果雞翼，色香味俱全，全場冇人有得揮！
我哋醒你樂廚三招
第1招 日日蘋果橙
Toby與Macy每天都會吃蘋果和橙，因可吸收足夠的鉀和維他命C對美容有幫助。
第2招 飲食要少糖
像今次Fans炮製的雪梨粥，她們就省去加入冰糖，因生果本身含有糖份，可減少吸收熱量。
第3招 廚房要整齊
Toby不能容許廚房亂糟糟，見到Fans把材料廚具周圍放，即刻幫手整理。「廚房整齊，食物企理，人都會健康點！」
心思菜：腐朽化神奇
自製價$60/4人份
真身：雜果粉絲沙津
煮教Macy
名稱是Macy的傑作，雜果粉絲沙津原本平平凡凡，但Macy想出用剩下的青提子莖修剪成樹木模樣，插在中間，沙津立即變成盆景菜，認真創意爆棚！
有料到
粉絲150克，車厘茄、青提子及火龍果適量、生菜1棵、沙津醬1/4樽、青提子莖一條（裝飾用）
調味料：鹽1茶匙、糖半茶匙、麻油少許
煮教金句
粉絲要完全瀝乾，生菜絲拌入沙津醬前亦須保持乾身，否則沙津醬會變淡，水汪汪。
心思菜：瀨尿雞翼
真身：蘋果雞翼
自製價$35/5人份
煮教Toby
瀨尿雞翼這個名稱好像很不雅，其實也是Macy改的，皆因她看見雞翼焗好後滲出香滑肉汁，一見就說雞翼「瀨尿」，認真想像力豐富。
有料到
蘋果2個、雞翼8隻、火腿3片
調味料：老抽2湯匙、豆粉少許、糖1茶匙
煮教金句
Toby教路，想雞翼口感好，落豆粉非常重要。仍覺肉身唔夠香脆可口，可加煮食用麵包糠再焗。
食得唔好嘥
Macy除了用提子莖發揮滿瀉創意外，見她將用剩的蜜瓜片、車厘茄、生菜粉絲倒落肚，果然很有節儉美德，大家學吓喇！
試食時間……
Toby與Macy一煮好雞翼和粉絲沙津，Fans們就急不及待要試食。只見他們食不停口，連伴碟生果都清晒，看來Toby與Macy的廚藝並非浪得虛名！
Fans評語
阿健：「Toby整嘅雞翼好入味，肉汁香濃，入面釀蘋果好爽，重好有心機砌埋伴碟生果，睇得又食得！
Eva：Macy嘅雜果粉絲鮮甜爽口，最緊要係中間做到成棵樹，好似冬日雪地咁，估唔到夏日菜式都可以有冰涼感覺。
