港股噚日升破14200後開始腳軟，但回吐亦有限，收14190，仍升29點，成交達269.56億元，萬眾矚目的交通銀行（3328）成交金額佔51.58億元。
交行首日掛牌表現無令捧場客失望，不過升至2.90元就見到德銀出力掟貨，將交行質回2.825元收市，較招股價高13%。原來德銀出咗份報告，話交行有160億元要撥備，股價可能跌至1.55元。嘩！若果真係要撥備160億元，今次交行集資所得近150億元咪要一Q清袋！
偉易達高息吸引
其實銀行有撥備一啲唔出奇，買得國內銀行作長線投資，大都預咗佢隨時作出大幅撥備，問題只係管理層能否帶領銀行度過難關，令到股價好似滙控（005）咁長升長有。買交行除咗短炒外，唔少股民都憧憬交行日後會成為國內的滙控，如果交行真係有幸跌至1.55元，會係一個唔錯嘅入市時機。
偉易達（303）業績較市場預期佳，全年增長23%至5690萬美元，而最重要係每股派末期息0.12美元（0.936港元），相當周三收市價11.25元的8.32%，即使昨日股價狂升38.7%至15.60元後，末期息仍相當於股價6%，對食息一族實相當吸引。
E-KONG話不明升因
E-KONG（524）出聲明，話唔明股價點解狂升，暫時並無出售及收購商討，變相否認大股東賣盤可能，但股價再升28%，收報0.28元。
慧峯（8228）周三大手成交，證實是主席潘國濂減持4000萬股，但就無講到股份是否落入強者手上，噚日股價調整3%至0.65元。
阿虎