靜咗好耐的牛皮紙箱生產商理文造紙（2314），將在6月28日公布截至今年3月止全年業績。經紀黃話，由於公司之前投資大量資金擴大產能，其中兩條新生產線已於去年下半年投產，加上大陸對紙箱產品需求強勁，因此今次公布全年業績估計會幾靚仔，相信無論營業額或盈利都有可觀增長，伺機短炒一轉亦諗得過。
經紀黃又話，綜合分析員的估計，理文造紙今次全年業績，盈利應有4億元樓上，即係比起去年增加四成幾。此外，今年公司會有新生產線投產，產能將繼續擴大，令營業額保持增長，所以就算睇長線亦冇話唔得。
理文造紙股價去年由7元高位回落，但大股東一直默默增持，直至上個月中，即係公布業績前約1個月先至停手，反映大股東對公司有信心，家陣理文股價仍然維持喺6元樓上，昨日冇升跌，平收6.40元，但可借成交始終比較疏落。
慕容小初