煲呔曾上咗京領聘書，過去一個月幫佢「打江山」嘅國際退休精英兵團──即係競選辦，今日就散Band。其實佢哋過去幾日已經執緊包袱，準備交番個場畀李國寶。
煲呔今次競選，係必勝之仗，但競選辦班人當正大戰咁砌，日日十六個鐘。今日之後，兩大公關都話會歸家蒙頭大睡三日三夜，邱福生有空去幫母校手搞金禧大晚會，Eva曾又可以準備去遊埠，陳德霖就去諗吓點樣縮短哈佛學習時期；至於李國寶，佢就大把嘢做。
普羅市民對競選辦最深印象嘅，可能係成日企喺煲呔後面出鏡嗰位高大靚女（圖）。有人以為佢係保鑣，查實佢係廉記前夥計，去年辭咗工賦閒在家，直至加入競選辦，一定唔係女G4。
傳真︰2623-9278
電郵︰[email protected]