民建聯主席馬力早排被癌魔折磨到落晒形，到最近先喺政壇活躍番，八方見佢精神好唔錯，原來佢已經完成咗整個化療，𠵱家只要間中返廣州打吓補針。馬力話康復得咁好，除咗多謝醫生，重要多謝老婆。
馬力舊年八月立法會選舉前無意間發現患上結腸癌，情況比較差，又退唔到選，於是唔理咁多，命仔緊要，上咗全國排名第一嘅廣州中山大學腫瘤醫院醫病，馬力嘅老婆從此要香港廣州兩邊奔馳。
馬力中大畢業，馬太亦係中大同學，𠵱家喺一間政府學校任教，為咗專心照顧老公，佢向學校請咗大半年假，馬力話對老婆非常感激。
馬力相信自己因為過勞而染病，最瘦嘅時候只得番六十公斤（即一百三十二磅），𠵱家梗係肥番晒，剛好重咗十公斤，有番一百五十四磅。病完一輪，馬力笑自己𠵱家好似做咗癌症專家。
傳真︰2623-9278
電郵︰[email protected]