中國人傳統上老公年紀大過老婆，不過衞福局局長周一嶽噚晚喺廠商會嘅晚宴上就話，港男有需要搞姊弟戀。
原因係𠵱家港男嘅平均壽命有七十八點五歲，係世界第一；但香港女士嘅平均壽命重長，有八十四點二歲，係世界第二，兩性相差近六歲。所以港男如果第日老咗想同老婆「一齊死」，最好娶個年紀大些少嘅老婆。不過，周一嶽一講完就話講笑啫！
周局長平日個樣都幾嚴肅，不過，自從上周喺記協晚會聽過佢講煲呔三級笑話後，大家都另眼相看。局長噚日又咁開心講笑話，同傳唔對嘴嘅醫管局行政總裁何兆煒宣布唔撈有冇關，八方就唔知喇。
另外，醫管局主席胡定旭噚日引用前總理朱鎔基嘅一句話讚何兆煒，原話係「不管前面是地雷陣或是萬丈深淵，我都鞠躬盡瘁，死而後已」，點知佢口快快講錯，後面變咗「我都可以走過去」。胡主席睇嚟要咪熟啲領導人語錄囉。
傳真︰2623-9278
電郵︰[email protected]