陳文媛（BoBo）去年與陳冠希（Edison）結束地下情，又因轉換經理人及唱片公司而令事業停滯，在娛樂圈沉寂了一年。BoBo承認上年是最失意之時，但她現在已收拾好心情，準備再在娛樂圈闖一番事業。
陳文媛去年事業、愛情兩失意，先有傳她與緋聞男友陳冠希結束三載地下情，其後又因轉經理人及由東魅跳槽到環球唱片公司而令事業停滯不前，直至近期無綫播出她有份演出的劇集《情迷黑森林》，才令BoBo稍添人氣。
緋聞完感釋放
日前BoBo在銅鑼灣接受訪問時說：「以前做新人時太幸福，𠵱家感覺係難行咗，好多嘢變得太快，我入行四年轉咗五次經理人，舊年係最失意嘅，公司（東魅）話唔再出唱片已經係一個大打擊，我從來冇諗過唔唱歌重有乜嘢路選擇，我覺得好迷惘。到簽咗環球之後，中間又發生好多事，但志偉畀咗好多意見我，到𠵱家總算有個新開始。」
有指BoBo與緋聞男友Edison的三年地下情亦於去年結束，她笑說：「到舊年大家至放過我，唔再講喇，反而畀機會我去撇甩呢種關係。」問BoBo與Edison是否關係有變時，她說：「佢永遠都係我嘅好朋友，大家唔會話唔再見面，一個人同我做朋友，呢世都會係。同佢做朋友咁耐，有乜唔開心嘅事唔會記住。」
不理對方私事
近期有報道Edison被拍到露下體照，緋聞更是從未間斷，BoBo稱她並不知情，問到是否不再介意對方的私生活？她說：「每個人有自己嘅生活，重要care人哋開唔開心，個個都唔開心咪大件事？但有乜需要，我都會幫。」BoBo謂現在須專心事業，下半年亦會推出新碟，然而她不會抗拒緣份來臨。
採訪：朱倬誼攝影：陳慧安
化妝：Kamen
髮型：CelvinLam@KenQi
場地：DecorCollection
