自由黨立法會議員梁劉柔芬（圖）早前傳個肺有事，五月底同立法會請假去咗美國醫，轉眼又成個幾月，八方打電話去佢辦公室問梁太近況，佢哋話冇新消息，八方問梁太喺今年會期結束前返唔返到香港，梁太助理都一概不知。
後來八方從自由黨中人口中，知道梁太家人最近有口信傳返香港，話Sophie目前情況安好，叫大家唔使太掛心。
根據《基本法》規定，假如某位立法會議員喺未得到立法會主席同意下，連續三個月不出席會議而無合理解釋者，可能會喪失議員資格；不過，梁太今次因醫病缺席，范太一定會網開一面嘅！
又八方上日出咗張田北俊同太太遊地中海嘅照片，之後聽到田太隻眼有事，去咗做個小小嘅眼手術，𠵱家已經冇事咯喎。
傳真︰2623-9278
電郵︰[email protected]