被視為AvrilLavigne勁敵嘅加拿大少女歌手SkyeSweetnam日前喺曼谷舉行演唱會，開騷之前大會邀請fans上台玩遊戲，其中喺模仿Skye唱歌嘅比賽中，一名「泰版肥欣宜」以騎呢台風同投入嘅演繹令全場笑到碌地，重打低咗兩位靚女fans成為冠軍㖭。
忘我演繹獲勝
現年十七歲嘅Skye憑處女大碟《NoiseFromtheBasement》迷倒唔少少男少女，佢首度喺曼谷開騷吸引咗唔少年輕fans捧場。喺演唱會開場前，大會舉行咗有獎遊戲環節，除咗有fans估Skye歌曲嘅搶答比賽外，重有Skye模仿大賽，三位女參賽者喺台上學偶像喺《BillyS.》嘅MV入面，揸住個手提攝錄機，一邊玩自拍一邊唱歌。頭兩位青春少女參賽者雖然模仿得似模似樣，但都唔及第三位參賽者「泰版肥欣宜」矚目，佢一邊忘我扭動肥臀，又一邊唱到面容扭曲，令全場觀眾以至台下幾十位亞洲傳媒笑到反肚，獲得最多掌聲，打敗兩位靚女成為冠軍。
Ｔ恤贈歌迷
遊戲完畢就到主角Skye出場，fans嘅情緒更加高漲，身穿綠色性感低胸同露臍裝嘅Skye喺band友伴奏下，擺出豪放嘅台風，唱出《NumberOne》同《BillyS.》等代表歌曲，重將一早預備嘅T恤拋畀台下fans，真係識做。