係咪後浪新作唔夠實力，冚唔晒推唔走舊作品？No！《狐忍》、《死亡筆記》、《Hunter×Hunter》等新一代作品一樣受歡迎，只係舊作印象太完美，兼重有大把發揮空間，最重要係有大把固有Fans支持，舊作品新搞作穩賺動漫迷嘅血汗錢！《星矢》、《入樽》、《強殖裝甲》等十幾二十年前開始連載嘅作品，近排都搞作多多，Figure、扭蛋、新版漫畫湧住推出，就連Cosplay友都繼續玩，撐硬佢哋翻生！
記者：馬慶武
攝影：伍慶泉
場地提供：CosplayCafe（23321089）
《聖鬥士星矢》Cosplay女 鍾情聖鬥士
小時候睇無綫深夜星矢卡通，早已有印象，阿幽、小琪、神樂3位Cosplay女近排睇見星矢玩具再出，金光閃閃多美麗，即時勾起對聖鬥士嘅回憶，分別自己落手做咗幾套聖衣，愛到出面！
星矢扭蛋升值4倍
對聖鬥士使出同樣招數係無用嘅，但動漫迷對星矢嘅硬銷招數就次次受落。可能因為剛啱喺歐美興起嘅關係，令到漫畫已完結超過10年嘅聖鬥士星矢喺日本國內都彈起翻生。除有全新繪畫嘅外傳式漫畫《聖鬥士星矢G》外，重有天界編序章動畫，另外Figure、扭蛋、PS2遊戲都有新作登場。
金屬製聖衣嘅神話系列Figure當然大熱，其中人馬座星矢由3百幾蚊炒到$500，玩具舖老闆兼星矢迷Enson話，約一年前陸續推出嘅一套21款Figure原價只要二百蚊左右，但前排炒價已經升到$1,000，估唔到熱潮同聖鬥士主角一樣──打不死！
其他跟風配角
《男兒當入樽》
香港獨有SlamDunk八達通表
每個入樽迷自96年後都有一個心願，就係「入樽」推出續集，直到早前慶祝總銷量突破一億本，「入樽」先有動作，除喺神奈川舉行展覽外，重有大量紀念產品推出，前排本地代理返咗一批限量Tee，三日內已經被人上網訂爆額。新一輪產品最近亦開始接受網上預訂，當中重有香港獨家發售嘅SlamDunk八達通手表，一隻儲一隻放上日本Bid嘢網，隨時炒起賺番筆！
㗎仔無份！SlamDunk八達通手表（$328）
香港獨家推出，限量發售，訂購期至26日。表面有櫻木圖案，勝在夠實用，約8月下旬有貨。
入樽最新代表作
SlamDunk大海報（$68）
A1SIZE超巨型海報，集多個好手場面而成。
1億冊紀念FINALEVENTDVD（$298）
收錄舊「神奈川縣立三崎高校」舉行嘅FINALEVENT過程，英、日文字幕，另附有一本《10天之後──》草稿集。網上訂購：jonesky.imaker.com.hk
其他翻生「動漫」
《強殖裝甲加爾巴》日本出電視版
用咗二十幾年，停吓出吓，畫咗二十幾期重未完，其實講到尾單靠一套作品捱足二十幾年，作者高屋良樹真係好巴閉。今年內日本就會有全新製作嘅加爾巴電視版上映，大量Figure會陸續推出，睇嚟加爾巴熱潮有望喺今年回歸。
《北斗之拳》出Tee撐新北斗
正連載嘅《蒼天之拳》變相係《北斗之拳》嘅前傳漫畫，動畫方面就直情打正旗號推出《新北斗之拳》，第一輯3集完咗無耐第二輯已緊接推出，除不斷推出新款嘅Figure外，最近重有潮舖入咗一批《北斗之拳Tee》，實行同日本同步翻撐新北斗。
《龍珠》再推新扭蛋
又一慢幾拍先喺歐美興起嘅作品，大量歐美PS2、XBox遊戲湧現，令好多機迷記番起龜波氣功、界王拳、元氣玉呢啲必殺技。另外日本亦推出一系列新製扭蛋，由於手工精細，亦令龍珠迷再次「DeeDee」聲爆發購買意欲。
最想邊套舊作繼續
AmberUnion（旺角始創中心2樓223號舖/25663995）
DoubleM（油麻地現時點商場1樓155號舖）
宇宙船（旺角奶路臣街19號地下/23902708）
