生化基金專家安森突然返到香港，住兩晚就返去矽谷。佢星期三響台灣桃園機場唔見咗本護照，上唔到機，惟有去報警。安森話台灣警察好有效率，報警後十五分鐘，已經通令所有由台北去過桃園機場嘅的士司機滙報，有冇在車上搵到、見到一本美國護照，又知會所住酒店到安森住嗰間房嚴密搜查。結果搵唔到，安森惟有返回酒店住多一晚，在床上反覆思量自己一日之內帶過本護照去過邊度，卒之俾佢諗到，參觀某高科技設施之時，被安全人員審查護照，先至准入內，但安森在另一出口被接上貴賓車離開，唔記得攞番本護照。立即通知警察，第二日一早，攞番本護照，警察重打電話通知國泰，畀佢立即上機㖭！
臨急臨忙，與安森到尖東RoyalGarden嘅日本餐廳「稻菊」食晚飯，講起生物科技投資的故事，呢位仁兄做咗十幾年生物科技，日日接觸美國最新嘅藥物發展，故事多多。佢話單哈佛專家鑽研印第安人治風濕之古藥方，就係將雞肋骨（白骨）磨碎成粉，服食之可治風濕，幾位科學家研究幾年，發覺係有功效，到矽谷搵創業基金投資製造新藥，點知俾啲猶太人老闆一腳踢番出嚟。安森話：「猶太人做生意諗得好全面，一定唔會吃虧。佢哋話，雞肋骨粉就算真有療效，都唔值得投資，因為傳出去之後，人人都識造，根本冇法子保證到知識產權，即係話利潤無保證，投資落去盞嘥氣。喺美國，諗唔通專利權，千祈咪搞。」
咁又係，印第安人磨碎雞肋骨作藥物，我哋中國人煲雞湯，食埋白骨，即係一樣啫。左丁山順便問埋安森，老人家膝頭蓋軟骨退化，行唔郁，加上肌肉退化，美國最新科技有乜辦法？安森話，喺矽谷，可以塞一個「由電腦度膝訂做嘅合金」入膝頭空隙，易到極。至於老人肌肉退化，可以試食DHEA，屬雄性荷爾蒙，可刺激肌肉發展。