江欣慈為了其創作歌手形象，不僅自資出碟，更將拍劇和擔任纖體代言人的機會全部推卻。然而許多人一聽阿慈要做創作歌手，第一個反應就是「佢得唔得㗎？」，難怪阿慈覺得最困難的是改變別人對她的偏見。
江欣慈自資六位數字推出唱片《黑白無常》，其實以她的條件，在娛樂圈搵食應該不難，偏偏她為達成創作歌手的夢想，將拍劇和拍廣告的機會全拒諸門外，不知情者還以為她嫌錢腥。
害怕白費心血
江欣慈日前說：「早排有人搵我拍劇，但我覺得咁辛苦先建立起創作歌手嘅形象，如果一拍嗰啲角色，咁之前嘅心血咪白費囉，所以就推咗；亦有人搵我拍纖體廣告，但我覺得着住三點式，好難拍得有型格，所以亦都推咗。其實我知創作歌手條路好難行，但係呢個係我嘅心願，我諗住趁後生，做一啲自己想做嘅嘢，唔做怕自己會後悔。」
江欣慈表示最困難的，是如何令聽眾拋低成見，她說：「好多人聽到我出唱片，啲歌重全部係自己創作嘅，第一個反應就係佢得唔得㗎，甚至聽都唔聽就否定咗我，我覺得最難係改變佢哋嘅偏見，如果佢哋聽完覺得我啲歌唔好聽，我都心甘命抵啲。出咗唱片後，見啲碟評都寫得幾好，咁都叫做有番啲安慰。」
衣着要求嚴謹
江欣慈是個頗執着的人，對於記者今次帶來的服飾，她表示不合自己的形象，堅持穿回自己的衣服，江欣慈以前是讀服裝設計，所以對穿衣要求很高，她說：「我又唔係一定要着名牌，好似今次啲衫，我係將舊衫剪爛變新衫。」
採訪：張止寒
攝影：仇志德
場地提供：Balalaika
