近排股市似乎好番些少，新股上市唔會潛水之餘，唔少業績唔錯嘅公司，同埋有「古仔講」嘅股票，都有幾好升幅。蘭西聽講，唔少股民都有斬獲，連近期喺本地電力市場惹嚟唔少聲音嘅慧峯，主席潘國濂都乘機沽貨套現，總共骨水二千三百二十萬！ 潘博士嘅上市公司慧峯，噚日發表通告，指大股東、即係潘國濂，日前用每股五毫八，賣咗四千萬舊股，冇話邊個接貨。 潘博士減持之後仍揸五成三股權，好穩陣。 今次邊個咁好眼光接咗潘博士批貨，會唔會係猛人呢？呢個問題嘅答案，最關心嘅一定係香港同九龍兩間公司。