經紀黃日前提及廸生創建（113），話預期公司全年業績會相當靚仔。噚日廸生公布業績，盈利2.03億元，比去年上升68.9%，較市場估計為高，除咗派末期息30仙外，另外又有特別股息46仙，兼夾10送1紅股，派送都算唔錯。
難怪廸生股價表現繼續堅挺，昨日又升3.21%，收14.45元，成交股數633.8萬股，金額1437.3萬元。
澳門賭業股雖然近期乏善可陳，但大廚的東方明珠（600）不但止跌回升，重上0.35元樓上外，成交亦明顯增加。
經紀陳話，江湖傳聞炒家有新水源到，所以股價好番好多，但就算有炒家助拳，隻股升幅估計亦有限，要重返之前高位的機會唔大，主要係上面蟹貨重重，暫時睇唔到理由炒家會炒高畀蟹貨甩身，況且公司方面亦冇乜新消息配合，所以都係遠遠哋睇吓算啦。
東方明珠昨日最高0.40元，收0.38元，升1.33％，成交股數3214萬股，金額1246萬元。
慕容小初