爵士上京前夕，顯示實力，召見特區政府駐外高官及佢哋嘅上司，包括大名鼎鼎嘅苗學禮、前行政署署長黃灝玄，重有林鄭月娥、韋玉儀，重有工商及科技局常秘俞宗怡呀咁，耳提面命，向全港顯示班底有力人馬！皆因為近來有人篤背脊，話爵士在公務員內樹敵甚多，所以好難組成一個班底！點知現在煲呔就吹雞畀你睇，雖然位位都係餘孽，不過真係粒粒巨星！
睇吓個陣容，先至恍然大悟！呢班人不約而同，在過去七年以來，都因各種原因，慘遭廢董班子流放！咁就證明，唔係煲呔冇班底，而係董集團以外放梁寶榮上北京為首，一早就釜底抽薪，同佢撕箝拆爪，有心先剝爵士光豬，再質把掃把佢揸住掃街，處心積慮，步步打擊！
外資有信心
尤其係苗學禮，因所謂短樁問題，成為民族情緒衝擊對象，明明唔關佢事，因政治理由，無喇喇孭到應，慘遭窮追猛打，迫佢辭職！好彩苗學禮忍辱負重功夫，同卧薪嘗膽嘅煲呔一樣深厚，捱過政治迫害，終於與爵士齊齊翻身，會唔會回塘另有任用就唔知嘞！
查實，苗學禮呢亭人才，牛津大學畢業，擁有非凡國際視野，不在話下，不過好少人知，佢亦係中東專家，精通阿拉伯文化！現時香港咁繁榮，聽講係拉登恐襲目標之一，所以，爵士若然有心想成立一個政治部，委任苗學禮做政治部首領，專責防諜、偷聽、心戰，兼負責香港內部安全，Report畀曾爵士，兼CC畀胡錦濤，為香港及國家安全，繼續發揮貢獻！
其他有份見爵士嘅官員，亦各有才華，特別係俞宗怡，理財有道，形象端莊，咁啱又小姑唔嫁，一早有「小吳儀」之稱，等爵士應咗賭王預測做夠十二年之後，由小俞接班，亦係理想人選喎係咪？
加埋行會嘅夏佳理、陳坤耀、李志喜、鄭海泉呀咁（若然呢四傑真係埋位），呢個牌面，外資就有信心，復禮創舊，同老董年代決裂，面目一新，睇爵士有冇牙力嘞！
傳真︰2623-9278
電郵︰[email protected]