大家重記唔記得屯門「茵翠豪庭」嘅爛尾樓事件，估唔到過咗咁耐重有餘波。噚日中國銀行入稟告新界鄉議局主席劉皇發（圖），追討百二萬訴訟費。
話說前年，劉皇發有關嘅兩間公司「永同益置業」同「展銷」入稟高院，向中銀追討茵翠豪庭樓盤一半權益，後來劉皇發撤銷訴訟，永同益重同中銀協議，今年一月二十五號或以前，會向中銀支付百二萬，點知中銀𠵱家都未收到，所以劉皇發就由告人變咗俾人告番轉頭。
呢類錢債官司，涉及金額都唔算大，噚日又有報道引述消息人士話，七月一日回歸紀念大日子，政府將會頒發大紫荊勳章，劉皇發榜上有名，照計中銀都應該收到風，但都咁緊張追數，睇嚟管治水平確有大躍進，各位小股東可以放心。
傳真︰2623-9278
電郵︰[email protected]