港股重上14000點大關，成交大幅增加，且升破長達4個月的降軌阻力，短期可向14330的徘徊區頂部推進。
在14000關前，港股已爭持近1個月，好淡對峙，看法上係淡友多過好友，實力上就好友勝過淡友。噚日升勢有大成交支持，確認後市向好，交銀（3328）資金回籠，上升動力可再增強，恒指在徘徊區頂部略作整固後，有力破位而上。
大市突破悶局，升勢由藍籌帶動，兩大重磅股滙控（005）同中移動（941）都有好表現，特別係滙控，在C輪計價期間竟然㩒唔住，大出淡友意料之外。藍籌上升多兩三日，市場氣氛明顯轉好後，二三線股就會接力而上。
國企升後整固，榮辱互見。吉林化工（368）衝上2字頭，已逼近預期上升目標2.10元；今次炒風再起，係因業績重拾升軌？母公司注資？還係私有化？留待時間分曉。上海石化（338）仍見有大行沽盤力壓，但有對手，以05年度（12月年結）預測PE不足5倍，息率接近8厘，且亦有私有化憧憬，係一隻一轉勢便有機會出現大升的股票，現水平持有，可攻可守。
PE低息率高
哈爾濱動力（1133）已調整多日，可候其回到2.80元至2.90元時吸入，博見3.30至3.50元。
太平洋航運（2343）走勢轉強，已升破幾條主要平均線阻力，顯示基金已發動攻勢，05年度（12月年結）預測每股盈利75.3仙，PE不足5倍，而以大行目標價5元計，預測PE亦僅6.6倍。
太航曾表示最少會將盈利的一半派息，04年度盤數靚，營業額2.34億美元，升332%，獲利1.04億美元，升356%，每股基本盈利0.748港元，升236%，若派息，每股可派0.37元，現價計息率逾10厘。05年度盈利再有進，息率更高。
鞍鋼（347）10日線升破20日線，升後整固，快將完成，係另一隻短線可升10%，而中線預期可賺30%的國企。今年首季，鞍綱營業額68.6億元人民幣，升55.6%，獲利6.03億元人民幣，升115%，業績勁勢持續，預測05年全年鞍鋼每股盈利0.85元，大行目標價5.10元，PE亦只6倍。06年新收購資產提供全年貢獻，PE更低。
郭兆誠