旺區日本料理店租金貴，成本轉嫁食客身上，食物價錢唔慌平得去邊。「御滿膳」在街市熟食中心開檔，名副其實可以街坊價嘗到酒店級質素日本料理，今趟主打各類蟹黃菜，碟碟蟹黃充足，由最平三十零蚊到最貴一百蚊鬆啲有交易，試勻6道菜$350有找，諗得過！
記者：陳冰麗
攝影：梁細權
蟹黃系列
蟹黃一品粥$108
3人份量，地道日式食法，8両重膏蟹、鮮蟹黃煲日本珍珠米，粥比較稠身似糊仔，撒上卜卜脆蟹子，正好平衡綿滑感覺。
去年市道不景，大廚兼老闆Jim能成功創業，全靠身邊好友幫忙：「初頭諗住開地舖，不過計唔掂成本！好彩接納馬基良師傅建議，喺熟食中心搞日本料理店條數易計得多。」他口中的馬基良師傅，是前君悅酒店鹿悅日本料理總廚，由他作幕後軍師猶如指路明燈：「我重有班朋友做海鮮批發，對日本來貨較熟悉，多得佢哋幫忙先開得成檔。」未來的7月1日是料理店一周年，Jim用真空包裝的青島蟹黃，設計一系列蟹黃菜式，務求街坊在這蟹季當造日子，吃盡蟹黃滋味。
蟹黃份量適可而止
蟹黃愈多愈好？非也！Jim解釋：「要適可而止，唔係一味多就好，過多反而會出現苦澀味，失卻原有鮮甜香味。」不過話雖如此，每道菜平均也用上50g蟹黃，要突出蟹黃鮮味，炮製時極考功夫：「以燉蛋為例，蟹黃要預先同鮮蟹肉、蝦肉、鮮冬菇一齊炒，火候要控制得好，過熟蟹黃會變苦，太生又會標油，蒸蛋嗰陣同蟹黃分開咗，就唔夠香㗎喇。」收到，明白。
蟹黃鵝肝醬釀燒飯糰$32
剖開，半凝固蟹黃鵝肝醬陣陣飄香；啖之，甘香徘徊不散，剛推出5日，日賣30個，特別受OL歡迎。
蟹黃燉蛋$35
用料多，除有雞蛋的滑及蟹黃的香外，還有鮮蟹肉、蝦肉等的鮮甜，鮮冬菇的質感，一啖有齊多重味道及口感。
蟹膏麵豉醬配鮮菜條$68
馬基良師傅傑作，冰鎮紅蘿蔔、蘆笋、西蘭花等雜菜，蘸滾住上枱的蟹膏和麵豉醬吃。
蟹黃焗蠔$45（上）、蟹黃海鮮炒拉麵$58（下）
拉麵用蟹黃炒過好香口，配沙白蜆及鮮蟹肉更鮮甜；焗蠔用的是日本廣島蠔，Size不大但勝在重海水味，炒過的洋葱、蟹黃與蠔肉釀回蠔殼，加蟹黃、麵包糠及芝士略焗，好香好Juicy。
其他推介
龍皇南北兩極配$78
「龍」指南非龍蝦仔，配海膽、蛋黃焗，熱食好香濃；「皇」指蘇格蘭蟶子皇，以清酒、木魚湯、乾菊生浸5秒凍食，原汁原味鮮味十足。
特色Pizza$38
日本燒海苔做Pizza底，Toppings有日本醋飯、三文魚、鮮蟹肉、南美虎蝦，撒意大利芝士一同焗，糅合日本與意大利風味。
食客有Say
御滿膳燒鳥居酒屋（25629229）
座位：80個
地址：北角渣華道街市及熟食中心2樓CF1-2
營業時間：星期二至六11:30am-2:30pm，5:30pm-11:00pm；星期日5:00pm-11:00pm；星期一休息。
