恒指彈升181點，上月初以來首次升破萬四大關。有人話有心人賀曾特首上任，營造氣氛。升幅3成嘅窩輪，幾乎有50隻。未來幾日，估計個市仍然有熱度，並且例牌個別發展。
滙控C輪3843：滙控（005）收126元，升1元。末日C輪4441升9仙，升幅87%。兩隻熱門C輪3807與4875，分別升8.5仙與9仙。
4441昨最後交易之後，壓住滙控嗰嚿雲消失，滙控有機會追番啲失地，以預期PE得13.6倍計，又係偏低啲，短期內踢多三兩蚊上去，有厚望焉，揸C輪等贏錢，可以向啲稍為中長期嘅C輪埋手。3843升7仙，升得少過3807同4875，呢隻諗得過。3843明年1月中到期，輪價35仙，溢價3.5%，槓桿率36倍（有效17.7倍），引伸波幅10.1%。
平保C輪2229：先幾日國壽（2628）炒上之後，中國財險（2328）又郁郁吓，平保（2318）又有跟大隊之勢，平保C輪可以搵些少搭吓順風車，賺番一盅兩件。
平保C輪唔係太多可揀，最靚嘅係2229，8月初夠鐘，輪價24.8仙，溢價1.7%，槓桿率5.1倍（有效4.4倍），引伸波幅59%。隻輪爆炸力稍弱，唔會令人大貴富，亦唔會令人大閉翳。
章盛